කුකුල් මස් රසම රසට පදම් කරගන්න පුළුවන් ක්‍රමයක්

මොකක්ද මේ marinade එකක් කියන්නේ..?හරිම සිංහලෙන් කියනවනම් මේකට කියන සිංහල නම තමයි "පදම් මුසුව" පදම් මුසුව යන්නෙන් අදහස් කරන්නේ අපි උයන්න කලින් මස් තුනපහ අතගාල තියෙනවනේ,අන්න ඒ වගේම මස් ටිකක් රොස්ට් කරගන්න,බේක් කරගන්න මස් වල තවරගන්න මිශ්‍රණයක් ඕනිනේ. අන්න ඒ සඳහා මේ marinade භාවිතා කල හැකියි.ඉතින් ඒ මිශ්‍රණයෙන් මස් ටික පදම් කරගන්නේ කොහොමද කියලයි අපි දැන් කියල දෙන්න හදන්නේ...

 අවශ්‍ය ද්‍රව්‍ය 

*ඔලිව් තෙල් කෝප්ප 1/2

*ලුනු තේ හැඳි 1

*ගම්මිරිස් තේ හැඳි 1/2

*සුදුරු කුඩු තේ හැඳි 1/2

*මිරිස් කුඩු තේ හැඳි 3/4

*චුටියට කපපු සුදුළුනු ගෙඩි 2

*චුටියට කපපු ළුණු මේස හැඳි 3

*චුටියට කපපු නැවුම් පාසලි කෝප්ප 1/2

*බියර් කෝප්ප 1 1/2

සාදන ක්‍රමය 

*මුලින්ම ඉඩකඩ තිබෙන භාජනයකට ඔලිව් තෙල් ටික දාගන්න.

*ඊට පස්සේ ලුනු,ගම්මිරිස්,සුදුරු,මිරිස් කුඩු එකට කලවම් කරගෙන අර ඔලිව් තෙල් එකට ගෙන මිශ්‍ර කරගන්න.

*දැන් මේ මිශ්‍රණයට සුදුළුනු ,ළුණු සහ පාසලි එකතු කරලා ගරුප්පුවක ආධාරයෙන් හොඳට කලවම් කරගන්න.

*ඊට පස්සේ මේ මිශ්‍රණයට බොහොම හෙමින් වැඩි කලබලයක් නැතුව බියර් ටික රෙකතු කර ගන්න ඕනේ.මොකද බියර් නිසා මේ මිශ්‍රණයේ පෙන සහ බුබුළු දාන්න ගන්න නිසා,පෙන ටිකයි,බුබුළු ටිකයි බැහැල ගියාම තව ටිකක් කලවම් කරගන්න.

ඔන්න අපි marinade එක හදලා ඉවරයි.දැන් අපි බලමු කොහොමද මේක පාවිච්චි කරන්නේ කියලා

මේ මරිනෙඩ් එකට ගොඩක්ම ගැලපෙන්නේ කුකුල් මස් කිවුවනේ.හරි දැන් ඔයාලට කරන්න තියෙන්නේ මැරිනෙඩ් කරන්න ඕනි කුකුල් මස් ටික අරගෙන තරමක ලොකු සිප්ටොප් බෑග්  එකක දාලා මේ හදාගත්ත මිශ්‍රණය ඒකට වත් කරගන්න එක. ඊට පස්සේ බෑග් එක හොඳට සීල් කරලා කීප වතාවක් එහෙ මෙහෙ කරවලා මැරිනෙඩ් එක හොඳින් කුකුල් මස් වල තවර ගන්න.

දැන් මේ පයක් හෝ රෑ එළිවෙනකන් හෝ ශීතකරණයේ දමා තබන්න.මතක ඇතුව විඩෙන් විඩ මේ බෑග් එක එහෙ මෙහෙ කරන්න මේ මැරිනෙඩ් එක මස් වල හොඳින් තැවරෙන්න.ඊට පස්සේ ඔබට පුළුවන් මේ කුකුල් මස් එක ඔයාල හදන්න හිටිය කෑම එක හදාගන්න යොදාගන්නට.     

.

ටිකක් වෙනස් විදිහට බිත්තර වලින් ඔම්ලට් එකක් හදමු

අවශ්‍ය ද්‍රව්‍ය 

*සිහින්ව පෙති කපා ගත් අල ගෙඩි 2ක්.
* බිත්තර 4ක්
*රස අනුව ලුනු සහ ගම්මිරිස් .
*අට ඉවත් කරලා පොඩියට කපාගත් තක්කාලි ගෙඩියක්
*සිහින්ව කපාගත් ළුණු කොළ ටිකක්
*සිහින්ව පෙති කපාගත් ළුණු ගෙඩියක්
*තෙල් මේස හැඳි 4ක්

සාදන ආකාරය 

*තෙල් ටික රත් වෙන්න හැර අල පෙති ඒ මතින් තබා ලුණු සහ ගම්මිරිස් ඉස අල රන්වන් පැහැ වනතුරු දෙපැත්තම බැදගන්න.
*අල බැදුණු පසු එයට ළුණු එක්කර ළුණු ටිකත් රන්වන් පැහැ වනතුරු අඩු ගින්දරේ බැදගන්න.
*බිත්තර වලට රස අනුව ලුනු සහ ගම්මිරිස් එක්කර බීට් කරගෙන එය පෑන් එක මත ඇති අල සහ ළුණු මිශ්‍රණයට එක් කරගන්න.
*එයට උඩින් තක්කාලි සහ ළුණු කොළ ටික දමා ගන්න.
*ඔම්ලට් එකේ යට කොටස පිසුණු පසු ප්‍රවේසමෙන් අනිත් පැත්ත හරවා දෙපැත්තම පුළුස්සා ගන්න.

නිවිති,අඹ,කෙසෙල් දමා කොළ පාට සමුදී එකක්

ඔන්න අපේ රස මිහිරට එක්වෙන ,නිතරම කෑම වේල මගහැරෙන අයට ගොඩක් වටිනා තවත් බීම වර්ගයක් හදන විදිහ තමයි දැන් කියලා දෙන්න යන්නේ.එහෙම කිවුවේ මොකද මේක විනාඩි 5කින් වගේ සුටුස් ගාලා හදාගන්න පුළුවන් බීමක් හින්දා වගේම සීනී,ඒ වගේම කිසිම කෘතීම රසකාරකයක් භාවිතා නොකරන නිසා මේක 100% ක්ම පෝෂ්‍යදායි පානයකි. අපි දැන් බලමු මෙය සකසා ගන්නා ආකාරය.

අවශ්‍ය ද්‍රව්‍ය

ලෙල්ල ඉවත් කර පෙති කපාගත්  ඉදුණු කෙසෙල් ගෙඩි 1ක් 

ලෙල්ල ඉවත් කර කොටු කපාගත් ඉදුණු අඹ ගෙඩි 1ක් 

ලපටි නිවිති කොළ කෝප්ප 1ක් 

කිරි කෝප්ප 1ක් 

අයිස් කට කෝප්පයක් 

සාදාගන්නා ආකාරය 

හදන්න නම් හරිම ලෙසියි.කරන්න තියෙන එකම දේ තමයි ඉහත අවශ්‍ය කරන ද්‍රව්‍ය යටතේ තිබුණු දේවල් ටික බ්ලෙන්ඩර් එකට දාගෙන විනාඩි 2ක් විතර ක්‍රීම් වගේ මිශ්‍රණයක් එනකන්  බ්ලෙන්ඩ් කරගන්න එක.

ඊට පස්සේ විදුරු දෙකකට මිශ්‍රණය වෙන් කරගෙන පිළිගන්වන්න තමයි තියෙන්නේ.

ක්‍රීම් චීස් සහ මිශ්‍ර පළතුරු බටර් කේක්

පළතුරු කෑලි හැපෙන රසම රස බටර් කේක් එකක් හදමු.

අවශ්‍ය ද්‍රව්‍ය

*බටර් 125g
*ක්‍රීම් චීස් 125g
*සීනි 185g
*බිත්තර 3
*පාන්පිටි 200g
*බේකින් පවුඩර් තේ හැඳි 1
*කජු 75g
*වියලි මිදී 50g
*පලතුරු කැබලි 50g
*වියලි චෙරි 50g

සාදාගන්නා ආකාරය

*මුලින්ම පාන්පිටි එක්ක බේකින් පවුඩර් කලවම් කරන් පෙනේරෙකින් හොදට දෙතුන් පාරක් හලාගන්න.
*පස්සේ භාජනයකට බටර්, ක්‍රීම් චීස් හා සීනි දා ගෙන හොදට බිට් කරන්න.
*දැන් එක සැරයකට 1 බිත්තරය ගානේ එකතු කරන් හොඳට බීට් කරන්න.
*ඊට පස්සේ පලතුරු ටික පොඩි කෑලි වලට කපලා එකටම කලින් හලා ගත්ත පාන් පිටි වලින් පොඩ්ඩක් දාලා පලතුරු වල පිටි දැවටෙන විදිහට හොඳට කලවම් කර ගන්න ඕනේ.
*ඊළගට කලින් බීට් කර ගත්ත මිශ්‍රණයට පිටි ටික එක්ක පලතුර්ය් ටික දාලා හඬකින් පෙරලමින් පිටි කැටි හිටින්නේ නැති වෙන්න කලවම් කරන්න.
*අන්තිමට බටර් ගා ගෙන පිටි ටිකක් ඉහ ගත්ත කේක් ටින් එකකට මිශ්‍රණය දා ගෙන කලින් සෙල්සියස් අංශක 175 උෂ්ණත්වයට රත් කර ගත අවන් එකක විනාඩි 45ක් පමණ බේක්  කර ගන්න.
*ඉන්පසුව නිවෙන්න හැරලා රස බලන්න තමයි තියෙන්නේ.

හාට් කුකීස්

ඔන්න දැන් කියලා දෙන්න යන්නේ ලස්සනම ලස්සන බිස්කට් වර්ගයක් හදාගන්න විදිහ.හාට් එකක හැඩයට මේ බිස්කට් එක හදන හින්දා හාට් කුකීස් කියලා තමයි මේවට කියන්නේ..බලන්නකෝ එහෙනම්.

අවශ්‍ය ද්‍රව්‍ය 

පාන් පිටි කප් 2
බේකින් පවුඩර්  තේ හැඳි 1/2
ලුනු ස්වල්පයක්
බටර් කප්  1/2 (120g ) කාමර උෂ්ණත්වයේ පැවතිය යුතුය
සීනි කප්  1(200g )
ලොකු බිත්තර 1
වැනිලා තේ හැඳි 1
කලරින් රෝස පාට හෝ කැමති පටකින් අවශ්‍ය පැහැයට අනුව හදාගන්න.

සාදාගන්නා ආකාරය 

*මුලින්ම භාජනයකට පාන් පිටි ටිකයි,බේකින් පවුඩර් ටිකයි,ලුණු ටිකයි දාලා කලවම් කරගන්න.
*දැන් වෙනත් භාජනයක් අරන් බටර් එක්ක සීනි දා ගෙන විනාඩි 3-4ක් විතර සාමාන්‍ය වේගයෙන් සැහැල්ලු මිශ්‍රණයක් ලැබෙනකන් බීට් කරන්න.
*පස්සේ එකටම බිත්තරයි,වනිලයි දාලා ටිකක් බීට් කරගන්න.
*ඊට පස්සේ බීටෙර් එකේ වේගය අඩු කරලා පාන් පිටි මිශ්‍රණය දා ගෙන කලවම් වෙනකන් බීට් කරන්න.(ඕනෙවට වඩා  බීට් කරන්න යන්න එපා මිශ්‍රණය කලවම් උනාම ඇති)
*දැන් කලරින් බින්දුව ගානේ සැරින් සැරේ දාන ගමන් මිශ්‍රණය අතින් අනා ගන්න.
*පස්සේ මිශ්‍රණය එක ගුලියට හදාගෙන පොලිතින් එකකින් හොඳින් ඔතලා ආවරණය කරගෙන පය 1 1/2ක් විතර ශීතකරණයේ තියාගන්න.
*දැන් මිශ්‍රණය අඟල් 1/4වගේ ඝනකම හිටින විදිහට කුකී කටාර් එකකින් හාට් හැඩ කපාගන්න.
*ඊට පස්සේ තෙල් කඩදාසියක් දා ගත්තු බේකින් තැටියක් අරගෙන ඒ උඩින් කපා ගත්ත කුකීස් ටික ඒවා අතර ඉඩ තියෙන විදිහට තියාගන්න.
*දැන් බේකින් තැටියත් එක්කම ඒ උඩ තියෙන කුකීස් ටික අධි ශීතකරණයට දා ගෙන විනාඩි 15ක් විතර තියාගෙන එලියට අරගන්න.
*අන්තිමට කලින් සෙල්සියස් අංශක 160 උෂ්ණත්වයට රත් කරගත්ත අවන් එකක් විනාඩි 8-10ක් විතර යන්තමින් රන්වන් පාට වෙනකන් බේක් කරගෙන නිවෙන්න තබන්න. 

බටර් නට් සුප්

රෑ කෑම ටිකක් අඩුවෙන් කන්න පුළුවන් නම් හොඳයි කියලා තමයි doctors ලා කියන්නේ.ඒත් ඉතින් මොනවහරි යන්තම් කාලා නිදියගන්න එකත් සෞක්යට ගුණ නෑ.ඒ නිසා සුප් එකක් වගේ එක්ක පාන් පෙත්තක් නම් පෝෂණීය රාත්‍රී අහාර වේලක් විදිහට අපට ආහාරයට ගන්න පුළුවන්.බටර් නුට් සුප් එකක් කියන්නෙත් නේ වගේ පෝෂණීය සැහැල්ලු ආහාරයක්.අපි බලමු එය සාදාගන්නා ආකාරය.

අවශ්‍ය ද්‍රව්‍ය 

වට්ටක්කා 250g
සැල්දරී 50g
ළුණු 50g
සුදුළුණු 50g
ලීක්ස් 50g
අමු මිරිස් 20g
බටර්  100g
පාන් පිටි 50g
කුකින් ක්‍රීම් 100ml
රස අනුව ලුනු ,ගම්මිරිස්

සාදන ක්‍රමය 

වට්ටක්කා හොඳින් සෝදා පොතු හැර කපාගන්න.භාජනය රත්වීමට ලිප තබා බටර් දමා ළුණු,සුදුළුනු,ලීක්ස්,සැල්දිරි සමග වට්ටක්කා එකතු කරගන්න.එයටම වතුර සහ පිටි දමා විනාඩි 40ක් පමණ මද ගින්නේ පිස ගන්න.ළිපෙන් බා ගත් සුප් එක හොඳින් බ්ලෙන්ඩ් කර යලි මද ගින්නේ තබා එයට කුකින් ක්‍රීම් සහ ලුනු,ගම්මිරිස් රස අනුව එකතු කර ගන්න.

කජු මිශ්‍ර චොක්ලට් ස්ල්යිසස්

අවශ්‍ය ද්‍රව්‍ය 

බිත්තර 4
සීනි 200g
ජෙලටීන් 10g
ෆ්‍රෙෂ් ක්‍රීම් 200g
ස්ට්‍රෝබෙරි ජෙලි පැකට් 2
කජු 200g
චොක්ලට් 200g (කුකින් චොක්ලට් )
අයිසින් සීනි 100g

සාදන ක්‍රමය 

*පළමුව චොක්ලට් ගෙන ඩබල් බොයිල් කර ගන්න.
*කජු සිහින්ව කපාගෙන රෝස්ට් කරන්න.
*කජු,චොක්ලට් මිශ්‍රණයට එකතු කරන්න,
*තැටියකට දමා සෙට් වෙන්න ශීතකරණයක තබන්න.
*පසුව චොක්ලට් තැටිය ඉවතට ගෙන තරමක කැබලි වලට වෙන් කරගන්න.
*ෆ්‍රෙෂ් ක්‍රීම් හොඳින් බීට් කරගන්න.
*හොඳින් බීට් උන පසුව එයට අයිසින් සීනි එකතු කර නැවත බීට් කරන්න..
*ජෙලටීන් උණු වතුරේ දිය කර,සෙට් කර ගන්න.
*සෙට් වූ පසු එය තරමක කොටු කපා ගන්න.
*සාදාගත් මිශ්‍රණය ලේයර් ආකාරයට දමා නැවත ශීතකරණයේ තබන්න.

බුරිටෝ

උදෑසන ආහාරයට මෙක්සිකන් ආහාරයක් 

හැම දාම උදේට බත් කාලා එපා වෙලා නේද..?ඉතින් නිතර දෙවේලේ බත් කාලා එපා උන අයට උදැසන අහාර වේලට පෝෂණ ගුණ සපිරි අලුත්ම අහාර වේලක් සකසා ගන්න විදිහ මේ කියන්න හදන්නේ.මෙක්සිකෝවට  පමණක්ම  අවේනික අහාර වේලක් ලෙස හඳුන්වන්න පුළුවන් බුරිටෝ පෝෂණ ගුණයෙන් ඉතාම ඉහලයි.ඒ වගේම සකසා ගැනීම ඉතාම පහසුයි.වෙළඳපොළේදී මිලට ගත හැකි corn trotilla  bread සොයාගන්න බැරි උනොත්,ඒ වෙණුවට ගොදම්බ්බ රොටි ආදේශකයක් ලෙස භාවිතා කරන්න පුළුවන්.මීගමුව ජෙට්වින් බීච් හෝටලයේ  සුපවේදී  ප්‍රසන්න පෙරේරා සකස් කළ මෙම රෙසිපිය ඔබත් අත්හදා බලන්න.

අවශ්‍ය ද්‍රව්‍ය 

corn tortilla bred
චෙඩාර් චීස් 50g
මොසරල්ලා චීස් 50g
හැම් 200g
අල 200g
refried beans 100g
තෙල් ස්වල්පයක්
සිහින්ව කපාගත් ළුණු 100g   
අවශ්‍ය පමණ ලුනු,ගම්මිරිස්
ටබැස්කෝ සෝස් ස්වල්පයක්

සාදන ආකාරය 

refried beens වියළි හෝ ටින් කර හෝ මිලට ගැනීමට ඇත.මුලින්ම ළිප දල්වා සාස්පානක් ළිප තබා එයට තෙල් ටිකක් දමා තෙල් රත්වෙන විට ළුණු දමා රන්වන් පැහැ වනතුරු බැදගන්න.ඉන්පසුව එය වෙනත් බඳුනකින් තබා නැවත refried beens  තෙලට දමා බැදගන්න.එයටම ලුනු,ගම්මිරිස්,ටැබැස්කෝ සෝස් දමා සීසන් කරගෙන පේස්ට් එකක් ලෙස සකසා ගන්න.ඒ අතරම,අල ගෙන සුද්ද කර කොටු කපා තම්බා ගන්න.ඉන්පසු tortilla bred එක ගෙන එයට refried beens  පේස්ට් එක bread එක මත තවර ගන්න.එම තවරුම මත තම්බාගත් අල,හැම් සහ චීස් තබා tortilla bread එක රෝල් එකක් ලෙස සකසා ගෙන ග්‍රිල් කර පිසගන්න.

චිකන් නගට්ස්

කුකුල් මස් වලින් ඉක්මනට හදාගන්න පුළුවන් පොඩි කෑමක් හදා ගන්න හැටි කියලා දෙන්නයි ඔන්න දැන් රස මිහිරෙන් සුදානම..මේවට කියන්නේ චිකන් නගට්ස් කියලා.වෙජිටේරියන් නොවන ඕනම කෙනෙක් මේවා කන්න නම් ගොඩක් කැමති වෙයි.මේවා කඩෙන් ගන්න ගියොත් නම් බොහොම 
ලොකු ගානක් වියදම් කරන්න වෙනවා.එත් ගෙදර හැදුවොත් ලබෙටත් රසකාරක වර්ග,කල් තබා ගන්න දේවල් නොදා බොහෝම සෞක්‍යරක්ෂිතවත් හදාගන්න පුළුවන්.අපි දැන් එහෙනම් බලමු මේ චිකන් නගට්ස් හදාගන්නේ කොහොමද කියලා.

අවශ්‍ය ද්‍රව්‍ය 

පාන් පිටි කෝප්ප 1
ලුනු මේස හැඳි 1 1/4
ගම්මිරිස් රස අනුව
ලොකු බිත්තර 2
සීසන් කරපු කොප්ප 2(සීසන් කරපු පාන් කුඩු සොයාගැනීම අපහසු නම් සාමාන්‍ය පාන් කුඩු කෝප්ප 2ක් අරගෙන තුන පහ කුඩු තේ හැඳි 1,මිරිස් කුඩු තේ හැඳි 1,සුදුරු කුඩු තේ හැඳි 1 බැගින් දාලා හොඳට කලවම් කරගන්න.)
චිකන් බ්‍රෙස්ට් /කුකුල් මස් පපු කොටස් 2ක් අඟලේ කොටු වලට කපලා
බැදගැනීම සඳහා එළවලු තෙල්
තක්කාලි සෝස් /කෙචප් (පිළිගැන්වීම සඳහා)

සාදාගන්නා ආකාරය 

*මුලින්ම පාන් පිටි,ලුනු සහ ගම්මිරිස් භාජනයකට දාලා කලවම් කරගෙන පැත්තකින් තියාගන්න.
*ඊට පස්සේ වෙනත් භාජනයක,බිත්තර 2යි වතුර මේස හැඳි 2කුයි එකට දාගෙන ගසා ගන්න.
*තව භාජනයක් අරගෙන පාන් කුඩු ටික දාගෙන පැත්තකින් තියාගන්න.
*දැන්,මස් කෑලි ටික මුලින්ම අපි හදාගත්ත පාන් පිටි මිශ්‍රණයේ පළමුවෙන් හොඳට තවර ගන්න.ඊට පස්සේ මේ මස් ටික බිත්තර මිශ්‍රනයේත් ,ඊට පස්සේ පාන් කුඩු වලත් හොඳින් තවරගන්න.
*දැන් ටිකක් ඉඩකඩ සහ ගැඹුර තියෙන තාච්චියකට අඟල් 2ක් විතර උසට තෙල් දාලා මද ගින්නේ රත් කරගන්න.එකේ තෙල් වලට පාන් කුඩු ටිකක් දාපු ගමන් බැදෙන්න ගත්තොත් ඒ කියන්නේ මේ තෙල් වල අපේ මස් ටික බැදගන්න ලෑස්තියි.
*දැන් භාජනයේ ඉඩ තියෙන විදිහට මේ මස් කෑලි ටික දාගෙන බැදගන්න.හැම පැත්තම හොඳට රන්වන් පාට වෙනතුරු මේ කෑලි ටික හොඳට ඉවෙනකන් බැදගන්න.
*දැන් මේවගේ තෙල් බේරාගෙන,ඊට පස්සේ තක්කාලි සෝස් එක්ක කට්ටියට පිළිගන්වන්න.

මෆින්

රසම රසට මෆින් හෙදරදීම හදමුද...?

සේවරි මෆින් එහෙමත් නැත්නම් රසම රස කප් කේක් වර්ගයක් ගෙදරදීම හදන්නේ කොහොමද කියලා තමයි දැන් කියලා දෙන්න යන්නේ.ඔයාලගේ ගෙවල් වලත් ඉන්නවනම් කමට හොර චුටි බබාලා,ඕගොල්ලොන්ට පුළුවන් වෙනසකට වගේ මේ කෑම ඒ ගොල්ලන්ට හදල දීලා බලන්න.මේක බැලු බැල්මට කප්  කේක් එකක් වගෙයි.හැබැයි පැණි රහ නෑ.මේක ලුනු රසයි.පොඩ්ඩොනම් ඔන්න ගොඩාක් කැමති වෙයි කන්න.බලන්නකෝ එහෙනම් මේ මෆින් හදාගන්නේ කොහොමද කියල..

අවශ්‍ය ද්‍රව්‍ය 

පාන් පිටි කෝප්ප 2(300g)

චෙඩාර් චීස් කොපප් 3/4(55g)

සිහින්ව කපාපු හැම් කෝප්ප 1/2

ඇට ඉවත් කර ලා පොඩියට කපාගත්තු මාළු මිරිස් කරල් 1 හෝ බෙල් පේපර් 

සිහින්ව කපා ගත් හතු කෝප්ප 1/4

බටර් 150g උණු කරලා.

නැවුම් කිරි කෝප්ප 1 (250ml)

යන්තමට බීට් කරගත්ත බිත්තර 1

කුඩාවට කපාගත්ත පාසලි මේස හැඳි 1

සාදාගන්නා ආකාරය 

*මුලින්ම ඔයාගේ අවන් එක සෙල්සියස් අංශක 180ට රත් කරගන්න.ඔයාගේ අවන් එක ෆැන් ෆොස්ඩ් අවන් එකක් නම් සෙල්සියස් අංශක 160ට රත් කරගන්න.

*ඒ වගේම මෆින් ට්‍රේ එකකට මෆින් ලයිනර් දලා ලෑස්ති කරගන්න.

*ඉන්පසු ලොකු භාජනයක් අරගෙන පිටි,චීස්මා,මාළු මිරිස් හා හතු දමා ගන්න,ඒ වගේම ජෝග්ගුවක් අරගෙන බිත්තර,කිරි සහ බටර් ටික දාගෙන මිශ්‍ර කරන්න.

*දැන් තෙත අමුද්‍රව්‍ය ටික වියලි අමුද්‍රව්‍ය ටිකට දාගෙන හොඳින් කලවම් වෙනතුරු මිශ්‍ර කරන්න.

*අන්තිමට කලින් සුදානම් කරගත්තු බේකින් ට්‍රේ එකට මේ මිශ්‍රණය වක්කරලා විනාඩි 15-20 ක් පමණ බේක් කරගන්න.

දැන්  වැඩ ඔක්කොම ඉවරයිනේ.ඊට පස්සේ ඉතින් මෆින් ටික නිවුනට පස්සේ කන්න තමයි තියෙන්නේ, 

වෙජිටබල්ස් උප්පුමා

අවශ්‍ය දේවල් 

රුලං කප් 3ක් අරගෙන කබලේ බැදගන්න.
හීනියට කපා ගත් ළුණු ටිකක්
කරපිංචා ටිකක්
කැරට් හා ළුණු කොළ
වේලිච්ච මිරිස් කෑලි ටිකක්.
අබ ඇට ටිකක්
රස අනුව ලුනු
මිරිස් කුඩු ටිකක්
වතුර කප්  3 1/2 පමණ (රුලං ගත් කප් එකම ගන්න.)

සකස් කරගන්නා ආකාරය 

*රුලං කප් 3ක් අරගෙන කබලේ බැදගන්න.
*භාජනයක් ලිපේ තියලා එකට තෙල් ටිකක් දමා රත් වූ පසු අබ ඇට ටිකක් දාන්න.
*ඒකටම වේලිච්ච මිරිස් කෑලි ටික හා කපාගත් ළුණු,කරපිංචා දමා තෙම්පරාදු කරගන්න
*පස්සේ රස අනුව ලුනු හා මිරිස් කුඩු ටික දමා හොඳින් මිශ්‍ර කර වතුර ටික ටික දමා හොඳින් උණු වෙන්න තියන්න.
*වතුර ටික හොඳින් නටන කොට කබලේ බැදගත් රුලං ටික, ටික ටික දමා හොඳින් මිශ්‍ර කරගන්න.
*පසුව ගින්දර අඩු කර පොඩි පිට්ටු කට මෙන් හැන්දෙන් කඩාගන්න.
*ඒකට පෙර සාදාගත් මිශ්‍රණය දමා ගන්න.හැබැයි 3/4ක ප්‍රමාණයක් පමණක් මිශ්‍රණය පුරවන්න.එයට හේතුව රුලං පිපෙන්න ඉඩ ඕනේ නිසා.
*ඉන්පසුව වන්ඩුවේ හෝ ස්ටීමර් එකේ තම්බා ගන්න.

චීස් ආප්ප

අවශ්‍ය ද්‍රව්‍ය 

කැකුළු හාල් කෝප්ප 2ක්
වෙලුනු පොල් ගෙඩියක් ගෙඩියක් ගා කිරි කෝප්ප 2ක්
සීනි මේස හැඳි 1
යිස්ට් තේ හැඳි 1/2
චීස් ස්ලයිස් කිහිපයක්
ගම්මිරිස් කුඩු ටිකක්

සකස් කරගන්නා ආකාරය 

*කැකුළු හාල් කෝප්ප 2ක් ගෙන පැය 4ක් ඇල් වතුරේ පොගවා ගන්න.
*වෙලුනු පොල් ගෙඩියෙන් ගා ගත් කිරි කෝප්ප 2න් එකක් දැන් පාවිච්චියට හා අනෙක ආප්ප හදන විට ගන්න වෙන් කරගන්න.
*වතුර බේරා ගත් කැකුළු හාල් ටික බ්ලෙන්ඩර් එකට දමා පොල් කිරි ටික ටික දමමිමන් කොටා ගන්න.එයට සීනි,යිස්ට් දමා හොඳට බ්ලෙන්ඩ් කරගන්න.
*මෙය එක රාත්‍රියක් තබා පසුවදා අනෙක් පොල් කිරි කෝප්පය මිශ්‍ර කරන්න.එය මිශ්‍ර කරන විට එකපාර නොදා ටිකෙන් ටික දාන්න.
*තමන්ට ඕනේ ප්‍රමාණයට පදම ආවාම කිරි දමන එක නතර කරන්න.ආප්පය තාච්චියට දමා බාගෙට තම්බීගෙන එන විට චීස් ස්ලියිස් එකක් ආප්පය මැදට දමන්න.එයට උඩින් ලුණු ස්වල්පයක් ද දමන්න. 

බේකඩ් ලෙමන් චිකන්

දැන් මේ ඔයාලට කියලා දෙන්න යන්නේ ඉතාම කෙටි වෙලාවකින් පිළියෙළ කරගත හැකි රසින් ගුනින් පිරි ලෙමන් චිකන් රෙසිපියක්. බේක් කෙඅගත් හෝ තම්බා ගත එළවළුත් එක්ක රෑ කෑමකට නියෙමෙට ගැලපෙනවා. එහෙනම් අපි හදලා බලමුකෝ.

අවශ්‍ය ද්‍රව්‍ය 

*චිකන් බ්‍රෙස්ට් 1/2ක් (කැබලි දෙකක් ලෙස මැදින් කපාගත්)
*ලෙමන් ගෙඩියක් (රවුමට පෙති කපාගත්)
*ලෙමන් උෂ  1 1/2
*සුදුළුනු මේස හැන්දක් (තලාගත්)
*දිය උණු බටර් මේස හැඳි 3ක්
*ලුනු තේ හැඳි 1/2
*ගම්මිරිස් ස්වල්පයක්
*කැරට් අලයක් හා අර්තාපල් අලයක් (කපාගත් කැමතිනම් පමණක්)

සාදාගන්නා ආකාරය 

*අවන් එකේ උෂ්ණත්වය සෙල්සියස් 200ක් ලෙස සකස් කරගන්න.
*අවන් එකේ දාගන්න පුළුවන් තැටියක් ගෙන එකට බේකින් ෂිට් එකක් දමන්න.නැත්නම් වැඩියෙන් බටර් ගාන්න.
*චිකන් බ්‍රෙස්ට් එකට සුදුළුනු,ලුනු,ගම්මිරිස් හා ලෙමන් යුෂ දමා හොදින් අතගා තැටියට දාන්න.
*චිකන් බ්‍රෙස්ට් කොටස් දෙකට යටින් රවුමට කපාගත් ලෙමන් පෙති තබන්න.
*දිය වූ බටර් චිකන් එකට උඩින් දමන්න.
*කැරට් හා අර්තාපල් කැබලි බේකින් තැටියේ ඉඩ තිබෙන තැන්වලින් තබන්න.
*දැන් තැටිය අවන් එකට දමා විනාඩි 40ක් බේක් කරගන්න.

චොක්ලට් බෝල

ඉතින් ඔයාලට දැන් මේ කියලා දෙන්න යන්නේ  රසම රස චොක්ලට් බෝල වර්ගයක් ගෙදරදීම හදාගන්නේ කොහොමද කියලයි.මේවා හදන්න ඕනි දේවල් හොයාගන්නත් එච්චර අමාරු නෑ.බලන්නකෝ එහෙනම් හදන්නේ කොහොමද කියලා..මේ විදිහට බෝල හදාගත්තට පස්සේ ඔයාලට කැමති විදිහකට බෝල ටික සරසා ගන්නත් පුළුවන්...

අවශ්‍ය ද්‍රව්‍ය 

කුකින් චොක්ලට් 400g
මාරි බිස්කට් 500g
ටින්කිරි පොඩි ටින් එකක්
බැදපු රටකජු 250g

හදාගන්නා ආකාරය 

*හරි දැන් තියෙන්නේ හදාගන්න.ඔයාලට මුලින්ම කරන්න තියෙන්නේ මාරි බිස්කට් ටික  භාජනයකට දාලා හොඳින් කුඩු කරගන්න එක.
*ඊට පස්සේ රටකජු ටික අරන් වියළි තාච්චියකට වගේ දාලා හොඳින් බැදගන්න. ඊට පස්සේ කජු වල පොතු හොඳින් සුද්ද කරගන්න ඕනේ.
*දැන් කරන්න තියෙන්නේ මේ රටකජු ටික බ්ලෙන්ඩරයට දමා කුඩු කරගන්න එක.ටිකක් කෑලි හැපෙන්න තිබුනොත් හොඳයි.
*ඊට පස්සේ කුඩු කරගත්ත රටකජු සමගින් කලින් අපි කුඩු කරගත්ත මාරි බිස්කට් ටික දාලා හොඳින් කලවම් කරගන්න.
*දැන් කරන්න තියෙන්නේ ඔයාලා ගොඩාක්ම කැමති වැඩක්,ඒක තමයි ටින් කිරි ටින් එක කඩන එක.
*දැන් කඩගත්ත ටින් කිරි එක රටකජු මාරි බිස්කට් මිශ්‍රණයට දාලා  එක්ක හොඳින් කළවම් කරගන්න.ඒක තලපයක් වගේ හොඳින් අනාගන්න ඕනේ.දැන් මේ මිශ්‍රණයෙන් ඔයාලා පොඩි පොඩි බෝල හදාගන්න ඕන.හදාගත්ත බෝල ටික තැටියක වගේ තියලා ඒ ටික පැත්තකින් ටිය ගන්න ටික වෙලාවක්
*දැන් තමයි පොඩ්ඩක් අමාරු වැඩේ තියෙන්නේ.ඒ තමයි චොක්ලට් දිය කරගන්න එක.චොක්ලට් ටික ඩබල් බොයිල් ක්‍රමයට දිය කරගන්න ඕනේ.දියකරගත් චොක්ලට් ටික ඉක්මනට ගල් වීම වලක්වන්න ඔයාලා චොක්ලට් රත් කරන කොට බටර් ස්වල්පයක් එකතු කරගන්න.එතකොට කුකින් චොක්ලට් ටික ගල් වෙන එක පොඩ්ඩක් හෙමින් සිද්ද වෙයි.
*දැන් බොහොම ඉක්මනින් ඔයාල හදා ගත් බෝල ටික මේ දියකරගත් චොක්ලට් එකේ ගිල්ලලා බටර් ටිකක් ගාපු තැටියක් මත වේලෙන්න හරින්න.
*චුට්ටක් වෙලුනට පස්සේ ෆ්‍රිජ් එකට දාලා මේ ටික කූල් කරගන්න.චොක්ලට් ටික හොඳට හයි වෙනකන් තිබ්බම ඇති.

ක්‍රීම් චීස්

ගෙදරදීම ක්‍රීම් චීස් හදා ගන්නේ මෙහෙමයි. 

ඔන්න දැන් කියන්න යන්නේ ගෙදරදීම ක්‍රීම් චීස් හදාගන්නේ කොමද කියලා. කරීම් චීස් අපිට ගොඩක් වෙලාවට ඕන වෙනවනේ.එහෙනම් අපි බලමු කොහොමද හදන්නේ කියලා.

අවශ්‍ය ද්‍රව්‍ය                                         

*සම්පුර්ණ යොදය සහිත නැවුම් කිරි 1ක් 

*දෙහි යුෂ තේ හැඳි 3ක් 

*ලුනු කුඩු තේ හැඳි 1ක් 

සාදන ආකාරය

*භාජනයක් ලිප තබා සාමාන්‍ය ගින්දරේ නැවුම් කිරි හොදින් නොනවත්වා හැඳි ගාමින් කිරි බුබුළු දමමින් නටා ගෙන එනතෙක් උණු කරගන්න.

*දැන් මදක් ලිප කර ගින්දර අඩුකර විනාඩියකට වරක් දෙහි යුෂ තේ හැන්ද බැගින් එකතු කරමින් නොනවත්වා හන්දිගාන්න.

*කිරි සම්පුර්ණයෙන්ම කැටි ගැසී, කැටි ටික උඩ පාවෙන තෙක් දිගටම නොනවත්වා හැඳි ගාගන්න.

*සුළු වෙලාවක් යනවිට කිරි සියල්ල කැටිගැසී කොළ පැහැ ද්‍රාවනයක පාවීමට පටන්ගනී. එවිට ලිප නිවාගන්න.

*පසුව ලොකු බෝල් එකක් උඩින් ස්ටේයින්ලස් ස්ටිල් පෙනේරයක් තබා එයට පිරිසිදු කපු රෙදි කැබැල්ලක් දමා ගෙන එයට සාදාගත් චීස් මිශ්‍රරණය වක්කර ගන්න.

*පසුව විනාඩි 15ක් පමණ වැඩි දියර බේරී සිසිල් වීමට එලෙසින්ම තබන්න.

*පසුව කපු රෙදිකඩින් චීස් ටික ගෙන මදක් මිරිකා බ්ලෙන්ඩර් එකකට දමාගෙන එයටම ලුනු කුඩුද එක්කර විනාඩි 4-5ක් හොදින් මිශ්‍ර කරගන්න.   

චිකන් කෝඩොන් බ්ලු

අවශ්‍ය ද්‍රව්‍ය 

චිකන් බ්‍රෙස්ට්
හැම්
චීස්
ලුනු
ගම්මිරිස්
බිත්තරයක්
පාන් කුඩු
තෙල්

සාදාගන්නා ආකාරය 

මුලින්ම චිකන් බ්‍රෙස්ට් එක මැදින් වෙන් නොවෙන සේ දෙකට පළාගෙන උඩින් ඉටි කොලයක් දාලා රෝලින් පින් එකකින් තලා ගන්න. එවිට එය පැතිලි වී තිබූ ප්‍රමාණය මෙන් දෙගුණයක් පමණ වෙයි. ඉන්පසු උඩින් දැමූ ඉටිකොලය ඉවත් කොට ලුනු,ගම්මිරිස් තවරා ගන්න.ලුනු,ගමිරිස් තවරා ගත් චිකන් බ්‍රෙස්ට් එක උඩින් හැම් හා චීස් පෙත්තක් තබා දෙකට නවාගෙන වටේ රෝලින් පින් එකකින් පොඩ්ඩක් තට්ටු කරමින් සීල් කරගන්න.ඉන්පසු එය බිත්තර සාරු වල තවරාගෙන,පාන් කුඩු දවටගෙන ගැඹුරු තෙලේ රන්වන් පාට වෙනතුරු බැදගන්න.

මින්ට් චොකලට් ඩ්‍රින්ක්

ඔන්න දැන් කියලා දෙන්න යන්නේ කූල්ම කූල්  චොකලට් ඩ්‍රින්ක් එකක් හදාගන්න විදිහ ගැනයි.බලන්නකෝ එහෙනම් හදන්නේ කොහොමද කියල...

                                අවශ්‍ය ද්‍රව්‍ය :

                                                         ෆ්‍රෙෂ් මිල්ක් කප් 6ක්
                                                         චොක්ලට් පවුඩර් මේස හැඳි 2ක්
                                                         කුකින් චොක්ලට් 200g
                                                         සීනි රස අනුව
                                                         වතුර කෝප්ප 1/2
                                                         මින්චි කොළ අහුරක්
                                                         වෙනම වතුර කප් 3ක්

සාදාගන්නා ආකාරය 

*වතුර කප් 3ට මින්චි කොළ අතින් පොඩි කර එක්කර අයිස් කැට හදාගන්න.ට්‍රේ එකකට දාල ෆිජ් එකට ගෙන අයිස් කැට හදාගන්න.
*වතුර,සීනි,කුකින් චොක්ලට් හා චොක්ලට් පවුඩර් එකට දමා ඩබල් බොයිල් කරගන්න.
*චොක්ලට් දියවීගෙන එන විට එයට කිරි දමා හොඳින් මිශ්‍ර කර පෙරා ගන්න.
*නිවෙන්නට හැර ශිත කරගන්න.එයට මින්ට් අයිස් කියුබ් දමා පිළිගන්වන්න. 

චොක්ලට් ඉක්ලෙයර්ස්

අවශ්‍ය ද්‍රව්‍ය 

* බටර් 60g
*වතුර 140ml
*ලුනු ටිකක්
*පාන් පිටි 80g
*බිත්තර 2
*විපින් ක්‍රීම්
*චොක්ලට් ක්‍රීම්

සාදන ක්‍රමය 

වතුර, ලුනු, බටර් භාජනයකට දමා රත්කර ගන්න. බටර් දියවෙන තුරු හැදිගාන්න. ඉන්පසු පාන්පිටි දමා කලවම් කරන්න. ටික වෙලාවක් නිවෙන්න තබා බිත්තර එකින් එක දමා කලවම් කරගන්න. පසුව පයිපින් බෑග් එකකට දමා දිග අතට මික්ස් එක පයිප් කරගන්න. මෙය රන් පැහැ වෙනතුරු සෙල්සියස් 230 වලින් විනාඩි 35-45ක් බේක් කරගන්න. පසුව මෙය දෙකට කපා චොක්ලට් අයිසින් හෝ විපින් ක්‍රීම් දමා වසා ගන්න. උඩින් උඩින් චොක්ලට් ක්‍රීම් දමා ලස්සනට  ගන්න.

මස්කට්

අපි දැන් රස මිහිරට එකතු කරන්නේ පොඩිත්තන්  ආසම කරන කෑමක් ගැනයි. ඒ තමයි මස්කට්. දැන් අපි එහෙනම්  බලමුකෝ මේ මස්කට් හදාගන්නේ කොහොමද කියලා ...

අවශ්‍ය ද්‍රව්‍ය 

සීනි 225g
වතුර 125ml
කොන්ෆ්ලා 60g
නැවත වතුර 120ml
කුඩාවට කපාගත් කජු මද
එනසාල් ස්වල්පයක්
තෙල් 100ml
කලරින් (කැමති වර්ණයකින් )
සූදුරු බොහොම ස්වල්පයක්

සාදාගන්නා ආකාරය 

භාජනයක් ගෙන සීනි 225g හා වතුර 125ml දමා කලවම් කර,සාමාන්‍ය තරමට රත් කරන්න.
බුබුළු දමාගෙන එනවිට ලිපෙන් බා ගන්න.
කොන්ෆ්ලා 60g හා වතුර 120ml දමා හොඳින් කලවම් කරගන්න.
එම භාජනය පසෙකින් තබන්න.
කලින් සීනි,වතුර මිශ්‍රණය නැවත ලිප තබා,කොන්ෆ්ලා මිශ්‍රණය ටිකෙන් ටික එකතු කරන්න.
ලිපේ ගින්දර හොඳටම අඩු කරන්න.
ඒ වගේම හොඳින් හැඳි ගාන්න.
මෙසේ මිශ්‍රණය හොඳින් කැටි නොගැසෙන සේ හොඳින් හැඳි ගාන්න.
ඝනකම බවක් ඔයාලගේ අතට දැනේවි.එවිට ලිප වහන්න.
නැවත ලිප දල්වා ගින්දර හොඳටම අඩු කරගන්න.
තෙල් ටික බැගින් මිශ්‍රණයට දමමින් හොඳින් කලවම් කරන්න.
දැන් එනසාල්,කජු,සූදුරු ස්වල්පයක් හා ඔබ කැමති වර්ණ දමා හොඳින් කලවම් කරගන්න.
ජෙලි වගේ පදමක් අතට දැනෙයි.
තෙල් තවරන ලද කෙසෙල් කොලයක් අරගෙන හොඳින් තුනී කර කෑලි කපාගන්න. 

ෆිෂ් කේක්

අවශ්‍ය ද්‍රව්‍ය 

*තොර මාළු හෝ පරව් මාළු 350g (මාළුවල මස් ටික පමණක් ගෙන කැලි වලට කපාගන්න)
*බිත්තර සුදු මද 2ක්
*ඉගුරු තේ හැඳි 2ක්
*කොත්තමල්ලි මේස හැඳි 2ක්
*හාල් පිටි මේස හැඳි 3ක්
*ලුණු තේ හැඳි 1ක්
*ගම්මිරිස් කෑලි තේ හැඳි 1ක්
*සුදුළුනු බික් 2ක් (කුඩාවට කපාගත්)

සාදන ක්‍රමය 

මාළු පොඩියට කපා පසෙකින් තබා ගන්න. බිත්තර සුදු මද දෙක මද වශයෙන් ගසා පසෙකින් තබාගන්න. පොඩියට කපාගත් ඉගුරු, සුදුළුනු, කොත්තමල්ලි කොළ, මාළු, හාල් පිටි, ලුණු, ගම්මිරිස් සියල්ල හොදට කවලම් කරගන්න. පෑන් එකක් ලිපේ තබා තෙල් ටිකක් දමා සාදාගත් මිශ්‍රණයෙන් ටික ටික ගෙන බර්ගර් හැඩයට සාදාගෙන බැදෙන්න හරින්න. බැදුනාට පසුව ලිපෙන් බා කෑමට ගන්න. දෙහි සමග පිළිගන්වන්න

ගාලික් බ්‍රෙඩ්

ඔන්න යාලුවනේ එහෙනම් අපි දැන් තවත් අලුත් කෑමක් සදීමටයි මේ සැරසෙන්නේ. අපි හදමු ගාලික් බ්‍රෙඩ් එකක්. ඔයාලත් ආස කෑමක් නේද...?

අවශ්‍ය ද්‍රව්‍ය 

පිටි 500g
සුදුළුනු 40g
බටර් 50g
සීනී 50g
යීස්ට් 10g
කිරිපිටි 8g
ලුණු 8g
බිත්තර 01
වතුර අඬුකෝප්ප එකයි තුන් කාලක් පමණ
අමතර බටර් මේස හැන්දක්

සාදන ක්‍රමය 

මුලින්ම බටර් දමා චොප් කරගත් සුදුළුනු ටික මදක් පිසගෙන පසෙකින් තබන්න.ඉන්පසු භාජනයක් ගෙන පිටි,සීනි,කිරිපිටි,යීස්ට්,බටර්,සුදුළුනු,බිත්තර
සහ ලුණු ද දමා කලවම් කරගන්න.ඉන්පසු වතුර දමා විනාඩි 10ක් හොඳින් අනාගන්න.විනාඩි 10කට පසු හොඳින් බටර් තැවරූ තැටිය මත දික් අතට සකසා ගත් පිටි ම්ක්ස් එක තබා විනාඩි 30ක් පිපෙන්නට හරින්න.උඩින් බිත්තර සාරු තවරා ගන්න.දැන් සෙල්සියස් 165 රස්නයෙන් විනාඩි 10ක් කලින් රත් කරගත් අවන් එකේ විනාඩි 25-30 පුළුස්සා ගැනීම ප්‍රමාණවත් වේ.

මාශ්මෙලෝ පීනට් බටර් බෝල්ස්

සුබ උදෑසනක් යාලුවනේ. අපි අදත් රස මිහිරෙන් අලුත් කෑමක් ගැන කියලා දෙන්නයි හදන්නේ. එහෙනම් බලමු මොකක්ද මේ කෑම කියලා.

අවශ්‍ය ද්‍රව්‍ය 

*රොස්ට් කරගත් අමු රටකජු
*අයිසින් සීනි
*මාශ්මෙලෝ
*බටර්

සාදන ක්‍රමය 

රටකජු වලින් කොටසක් බටර් එක්කර මෘදු පේස්ට් එකක් වනතුරු ග්‍රයින්ඩ් කරගෙන එයට රස අනුව අයිසින් සීනි එකතු කරන්න. ඉතිරි කොටස තරමක් කෑලි සිටින ලෙස ග්‍රයින්ඩ් කරගන්න. මාශ්මෙලෝ කෑල්ලක් මැදට සිටිනසේ රටකජු පේස්ට් එකෙන් ආවරණය කර බෝලයක් සාදා ගන්න. කැබිලි සිටින්න අඹරා රටකජු උඩින් දවටා කෑමට ගන්න තුරු ශීතකරණයේ තබන්න.

සමපෝෂ කුකීස්

ඔන්න අද කියලා දෙන්න යන්නේ සමපෝෂ හරි ත්‍රිපෝෂ හරි දාලා ලේසියෙන්ම හදා ගන්න පුළුවන් බිස්කට් එකක් ගැන.අපි බලමු එහෙනම් කොමද හදන්නේ කියලා.

අවශ්‍ය ද්‍රව්‍ය 

*සමපෝෂ හෝ ත්‍රිපෝෂ කප් 2ක්
*සීනි කෝප්ප 2 1/2ක්
*බටර් කෝප්ප 3/4ක්
*බිත්තර 2ක්
*වැනිලා ටිකක්
*පාන් පිටි කප් 2ක්
*බේකින් සෝදා තේ හැන්දක්
*බේකින් පවුඩර් තේ හැඳි 1/2ක්
*පොල් කෝප්ප 1ක්
*ලුණු ස්වල්පයක්

සාදාගන්නා ආකාරය 

*බටර් මෘදු වනතෙක් එළියෙන් තබා එයට සීනි එක්කර ක්‍රීම් වනතෙක් බීට් කරගන්න. බිත්තර එකින් එක දමමින් නැවත නැවත බීට් කරගන්න.
*පිටි වලට බේකින් පවුඩර් හා සෝදා සමග ලුණු එක්කර වරක් හලාගන්න. එයට පොල් එකතු කර බිත්තර මිශ්‍රණයට දමා හොදින් කලවම් කරගන්න.
*හොදින් බටර් ගා තෙල් කඩදාසියක් දාගත් තැටියක කුකීස් සාදා තබා සෙල්සියස් 180 වට කලින් රත් කරගත් උදුනක දමා විනාඩි 8-9ක් රන්වන් පැහැ වනතුරු බේක් කරගන්න.

ඇමරිකන් ෆ්‍රයිඩ් රයිස්

ඔන්න දැන් කියලා දෙන්න යන්නේ ඇමරිකන් ෆ්‍රයිඩ් රයිස් හදන්නේ කොහොමද කියලා.ඇමරිකන් කියලා කිවුවට මේක ඇත්තටම හදන්නේනම් ඇමරිකාවේ නෙමෙයි. මේක තායි කෑමක්.බලමුකෝ එහෙනම් හදන්නේ කොහොමද කියලා.

අවශ්‍ය ද්‍රව්‍ය

*පොඩියට කපාගත් ළුණු ගෙඩියක්
*තලාගත් සුදුළුනු බික් 2ක්
*කොටු කපාගත් කැරට් කප් 1/4ක්
* ග්‍රීන් පීස් කප් 1/4ක්
*බඩ ඉරිගු ඇට මේස හැඳි 3ක්
*පිස ගත බත් කෝප්ප 3ක් (ශීතකරණයේ තබාගත් බත්නම් වඩාත් සුදුසුයි)
*සොයා සෝස් මේස හැන්දක්.
*තක්කාලි සෝස් මේස හැඳි 2ක්.
*ගම්මිරිස් කුඩු ස්වල්පයක්, රස අනුව ලුණු
*බිත්තර 2ක්
*සොසේජස් හතරක්
*බැදගත් චිකන් ඩ්‍රම්ස්ටික් 2ක්.

සාදාගන්නා ආකාරය 

*මුලින්ම ඉඩ කඩ ඇති භාජනයක් ලිප තබා තෙල් මේස හැඳි 3ක් පමණ එක්කර රත්වෙන්න හරින්න.
*ඉන්පසු එයට ළුනු, සුදුළුනු හා කැරට් එක්කර තෙම්පරාදු කරගන්න.
*ඉන්පසු එයට ග්‍රීන් පීස්, බඩ ඉරිගු ඇට ටික එක්කර පිසගත් බත් එක්කරන්න. එයට තක්කාලි සෝස්, සෝයා සෝස්, රස අනුව ලුණු හා ගම්මිරිස් කුඩු මිශ්‍ර කරගෙන තරමක් වැඩි ගින්දරේ කලවම් කරගන්න. හොදින් කලවම් වූ  ඉවත් කරගන්න.
*සාදාගත් රයිස් එක, බැදගත් සොසේජස්, බුල්සයි දමාගත් බිත්තර, බැදගත් චිකන් ඩ්‍රම්ස්ටික් සහ පෙති කපාගත් තක්කාලි සමග පිළිගන්වන්න.

වැදගත් :  බුල්සයි දමාගත් බිත්තර කිවුවම බයවෙන්න එපා. තාච්චියට තෙල් පොඩ්ඩක් දාලා වෙනදා හදන විදිහටම ඔම්ලට් එකක් හදාගන්න කහ මදේ
කලවම් කරගන්නේ නැතුව.  
             

විපින් ක්‍රීම්

මේ දවස් වල අපි හදපු ගොඩක් කෑම වලට විපින් ක්‍රීම් යොදා ගත්තනේ.ඔන්න ඒ නිසා අපි හිතුවා විපින් ක්‍රීම් ගෙදරදීම හදාගන්නා විදිහ ඔයාලට කියලා දෙන්න.මුලින්ම කියන්න ඕනේ මේ නියමම විපින් ක්‍රීම් නම් නොවේ, විපින් ක්‍රීම් වලට ආදේශකයක් විතරයි.මොකද විපින් ක්‍රීම් ගෙදරදී හදන්න හරි අමාරුයි.මේ අපි හදන විපින් ක්‍රීම් එක යොදාගෙන කේක් අයිසින් වැඩ මූස් වගේ දේවල් හදන්න පුළුවන්.එත් ඉතින් හැමදේම හදන්න නම් බෑ.     

අවශ්‍ය ද්‍රව්‍ය 

ශීතකළ සම්පුර්ණ යොදය සහිත නැවුම් කිරි 300ml
ජෙලටීන් පවුඩර් තේ හැඳි 2ක් හෝ 20g

සාදාගන්නා ආකාරය 

*මුලින්ම ශිතකළ කිරි 60ml ක් කුඩා භාජනයකට දමා ගන්න.
*දැන් මෙයට ජෙලටීන් පවුඩර් ටික ඉසගෙන ගෑරුප්පුවකින් කළවම් කරගෙන විනාඩි 10ක් පමණ එලෙසම තියන්න.(ස්පොන්ච් ගතියට ටිකක් එබෙන ටිකක් ඝනකම් වූ මිශ්‍රණයක් ලැබේවි.)
*දැන් ඩබල් බොයිල් ක්‍රමයට සකසා ගත් කිරි සහ ජෙලටීන් මිශ්‍රණය විනාඩි කිහිපයක් රත් කරගෙන හොදින් දිය කරගන්න.
*දැන් දියකර ගත් කිරි සහ ජෙලටීන් මිශ්‍රණය විනාඩි 5ක් පමණ මදක් නිවෙන්නට හරින්න.
*පසුව වෙනත් භාජනයක් ගෙන එයට ඉතුරු ශීතකළ කිරි 300ml දමන්න.
*එයට දියකර ගත් මිශ්‍රණය එකතු කර හොඳින් ගෑරුප්පුවකින් කළවම් කරගෙන විනාඩි 15-20ක් පමණ ශීතකරණයේ තබන්න.(මිදෙන්නට හරින්නට එපා)                                 
*ඉන්පසුව එය ශිතකරණයෙන් එළියට අරගෙන හැන්දකින් ටිකක් කළවම් කරන්න.(උකු ගතියක් දැනේවි.)
*දැන් බීටරයකින් හොඳින් බීට් කරගන්න.(ප්‍රමාණයෙන් දෙගුණ වෙලා උකු ඝන ස්වභාවයට විපින් ක්‍රීම් හැදෙනවා දකින්න පුළුවන්.     

චොක්ලට් ලාවා කේක්

ඔන්න දැන් ඔයාලට කියාදෙන්න හදන්නේ රසම රස කේක් එකක් හදන විදිහයි.මේ කේක් එකට කියන්නේ චොක්ලට් ලාවා කේක් කියලයි. කේක් එකෙන් කෑල්ලක් කපුවහම ගිනි කන්දකින් ලාවා ගලනවා වගේ කේක් එක ඇතුළෙන් චොක්ලට් එලියට එනවා.එහෙනම් බලමු අපි මේ ලාවා කේක් හදන්නේ කොහොමද කියලා.

අවශ්‍ය ද්‍රව්‍ය 

*ඩාර්ක් චොක්ලට් 250g
*බටර් 115g
*බිත්තර 03ක්
*අයිසින් සීනි 100g
*පාන් පිටි 60g (පෙනේරයකින් හලාගත් )
*වැනිලා තේ හැඳි 01ක්

සාදාගන්නා ආකාරය 

*මුලින්ම ඩබල් බොයිල් ක්‍රමයට ඩාර්ක් චොක්ලට් ටිකයි, බටර් ටිකයි එකට දාලා දිය කරගෙන, හොඳට කළවම් කරලා පැත්තකින් තියාගන්න.
*ඊට පස්සේ භාජනයකට බිත්තරයි අයිසින් සීනියි දාලා විනාඩි 2-3ක් විතර හොඳට බීට් කරගන්න.
*දැන් කරන්න තියෙන්නේ ඒකටම වැනිලා එක් කරගෙන තව ටිකක් බීට් කරලා කලින් දිය කරගත් චොක්ලට් මිශ්‍රනයටම දාගෙන කළවම් කරගන්න
 එක
*ඊට පස්සේ ඒකටම පාන් පිටි ටික දාගෙන හැන්දකින් කලවම් කරගන්න.
*ඊට පස්සේ බේක් කරන්න පාවිච්චි කරන භාජනයකට බටර් ටිකක් ගාගෙන කේක් මිශ්‍රණය දමා ගන්න.
*දැන් තියෙන්නේ සෙල්සියස් අංශක 200ට රත් කරගත් අවන් එකක විනාඩි 12-15ක් පමණ බේක් කරගන්න එක.
                     

මයෝනිස්

දැන් අපි කියලා දෙන්න යන්නේ ගෙදරදීම මයෝනිස් හදාගන්නේ කොහොමද කියල 

අවශ්‍ය ද්‍රව්‍ය 

*බිත්තර කහ මද 03ක්
*තෙල් 300ml
*අඹරගත් අබ තේ හැඳි 1/4 - 1/2 පමණ (රස අනුව අඩු වැඩි කරගන්න.)
*ලෙමන් යුෂ මේස හැඳි 01ක් පමණ (එයත් රස අනුව අඩු වැඩි කරගන්න.)
*අඹරගත් සුදුළුණු බික් 1-2ක්
*ලුනු
*ගම්මිරිස් කුඩු

සාදාගන්නා ආකාරය 

මුලින්ම බිත්තර කහ මද ටික පිරිසිදු වියළි භාජනයකට දමා ගන්න.
දැන් එකටම අඹරපු අබ ටිකයි සුදුළුනුයි දාගෙන කවලම් වෙනකන් යන්තමින් බීට් කරන්න.
ඉට පස්සේ බොහොම හිමින් තෙල් වක්කරන ගමන් උකු වී ගෙන එනකන් හොඳට බීට් කරන්න.(දිගටම නොනවත්වා බීට් කල යුතුයි.)
මිශ්‍රණය හොඳට උකු,මතුපිටින් දිලිසෙන,ඝනකම් ක්‍රීම් ගතියට එනකන් හොඳින් බීට් කරන්න.
අන්තිමට රස අනුව ලෙමන්,ලුනු,ගම්මිරිස් එකතු කර කවලම් වෙනකන් යන්තමින් බීට් කර, ශීතකරණයේ දමන්න.

වැදගත් :  මෙය ශීතකරණයේ සතියක් පමණ තබා ගත හැක.හැම විටම බීට් කරන විට එකම අතට බීට් කල යුතුයි.භාවිතයට ගත හැකි තෙල් (සුරියකාන්ත තෙල්,කැනොලා ඔයිල් , තල තෙල් නැතිනම් පොල්තෙල්,එළවළු තෙල් උනත් ගත හැකියි.) 

මොසරැල්ලා ස්ටික්ස්

කට්ලට් වගේ කෑමක් තමයි මේවත්. හැබැයි හදන්නේ චීස් වලින්. ඒ හින්දම ඉතින් රසගැන නම් අමුතුවෙන් කියන්න ඕනේ නෑ.චීස් කන්න අකමැති අය නැනේ. ඒ කොහොම උනත් මොසරාලලා ස්ටික්ස් වල පෙනුම දැකපුවාම කන්නේ නැතුව ඉන්න පුලුවන්ද? නේද,

අවශ්‍ය ද්‍රව්‍ය 

*කොටු හැඩයට, දිගට, මහතට කපාගත් මොසරැල්ලා චීස්
*විස්ක් එකකින් යාන්තම් ගසාගත් බිත්තරයක් (කට්ලට් වලට වගේ)
*පාන් කුඩු
*පාන් පිටි කප් 2/3
*කෝන්ෆ්ලා 1/3 (ඉරිගු පිටි)
*ලුනු 
*සුදුළුණු පවුඩර් (කැමතිනම්)

සාදාගන්නා ආකාරය 

*භාජනයක් අරගෙන පිටි වර්ග දෙක මිශ්‍ර කර පසෙකින් තබන්න.
*ඊට පස්සේ තව භාජනයක සුදුළුණු පවුඩර්, ලුනු , පාන් කුඩු වලට මිශ්‍ර කර පසෙකින් තබන්න.
*දැන් කපාගත්තා මොසරැල්ලා චීස් ටික අරගෙන පිටි මිශ්‍රණයේ දවටලා ඉන්පසු ගසාගත් බිත්තරයේ සාරුවල තැවර ගන්න ඕනේ.
*පාන් කුඩු මිශ්‍රණයේ දවටාගෙන ගැබුරු තෙලේ තත්පර 30ක් පමණ බැදගන්න .

මිනි පීසා

ඔන්න දැන් අපි කියලා දෙන්න යන්නේ රසම රස මිනි පීසා හදාගන්නේ කොහොමද කියලා.බලන්නකෝ එහෙනම් හදන විදිහ.

අවශ්‍ය ද්‍රව්‍ය 

*පාන් පිටි 650g
*යීස්ට් තේ හැඳි 2ක්
*සීනි තේ හැඳි 2ක්
*වතුර කෝප්ප 1/2ක්
*තවත් වතුර කෝප්ප 1 3/4ක්
*ඔලිවූ තෙල් මේස හැඳි 2ක්
*ලුණු තේ හැඳි 1 1/2ක්
*තක්කාලි පුරි කෝප්ප 1ක්
*රතු බෙල් පේපර් 1ක්
*කහ බෙල් පේපර් 1ක්
*බ්ලැක් ඔලිවූ 20ක් පමණ
*ලොකු ළුණු ගෙඩියක්
*පොඩි සොසේජස් පැකට් 1ක්
*චීස් 250g

සාදාගන්නා ආකාරය 

*මුලින්ම යීස්ට් හා සීනි මඳ රස්නයෙන් යුතු වතුර කෝප්ප 1/2කට කවලම් කර විනාඩි 10-15ක් පමණ පැත්තකින් තියලා පිපෙන්නට හරින්න.
*ඊට පස්සේ පාන් පිටි වලට 4ඒ ඊස්ට් මිශ්‍රණයයි, ඔලිවූ තෙල්, ලුණු හා වතුර කවලම් කරමින් හොදින් අනාගන්න ඕනේ. පිටි බෝලයක් වන තුරු අනාගන්න. 
*ඊට පසු පැයක් පමණ පිපෙන්නට හරින්න.
*ඉන්පසු ඒ පිටි බෝලය කඩලා කුඩා බෝල කිහිපයක් සාදාගන්න.
*දැන් පීසා බේක් කරගන්න අවන් එකට දාන්න පුළුවන් තැටියක් අරගෙන තැටිය මත ඔලිවූ තෙල් තවරාගන්න.
*ඉන්පසුව පොඩි පිටි බෝල අරගෙන තැටිය මත තියලා රොටියක් වගේ තුනී කරගන්න.(ගොඩක් තුනී කරන්න එපා)
*ඉන්පසුව ඒ මතට තක්කාලි පුරි දමාගන්න.
*ඊට පස්සේ එකට උඩින් බෙල් පේපර් දමාගන්න.
*පසුව සොසේජස් දමාගන්න.
*දැන් බ්ලැක් ඔලිවූ හා ලුණු දමා අන්තිමට චීස් ඉසින්න.
*මෙය තව පැය 1/2ක් තබා, සෙල්සියස් අංශක 350 උෂ්ණත්වයට කලින් රත්කළ අවන් එකක විනාඩි 10ක් බේක් කරගන්න.

සැමන් හා චීස් සෝස් පැස්ටා

  අපි බලමු සැමන් හා චීස් සෝස් පැස්ටා හදන්නේ කොමද කියලා. මේක බේක් කරලා වගේම නිකනුත් කෑමට ගන්න පුළුවන්. සැමන් වලට අකමැති කෙනෙකුට ඒ වෙනුවට ආදේශක භාවිතා කිරීමට පුළුවන්.බලමුකෝ එනම් කෝමද හදන්නේ කියලා.

අවශ්‍ය දේවල්

* සැමන් ටින් එකක්.
*ක්‍රීම් චීස් කැබලි 2-3ක් (හැපි කවු, කොත්මලේ වුනත් කමක් නැ)
* නැවුම් කිරි කෝප්ප 2ක්
*තිරිගු පිටි පුරවලා මේස හැඳි 1ක්
*ලුණු චුට්ටක්
*ගම්මිරිස් චුට්ටක්
*චුටියට කපාගත් අමු මිරිස් කරලක්
*චුටියට කපාගත් ලොකු ළුනු ගෙඩියක්
*චුටියට කපාගත් සුදුලුනු බික් 2-3ක්
*තෙල් මේස හැන්දක්
*කැමති ජාතියක පැස්ටා 200g
*මාගරින් තේ හැන්දක්
*ත්යිම්ස්,රෝස්මරි චුට්ටක් (තියෙනවනම් විතරක්)

බේක් කරන්න කැමති අයට විතරක් 

*හීනියට ගාගත් මොසරැල්ලා චීස් මේස හැඳි 5-6ක්
*බිස්කට් කුඩු මේස හැඳි 5-6ක් 

සාදාගන්නා ආකාරය 

*පැකට් එකේ තියෙන විදිහට පැස්ටා ටික තම්බා ගන්න.(එහෙම තම්බා ගන්නකොට මාජරින් තේ හැන්දක් දමන්න)
*පෑන් එකක් ලිපේ තියලා තෙල් මේස හැඳි 2ක් දාලා සුදුලුනු, ලොකු ලුණු, අමු මිරිස් තෙම්පරාදු කරගන්න.
*එයට නැවුම් කිරි ටික දාලා හොදට හැඳි ගාන්න.
*දැන් ඒ කිරි එකට කරීම් චීස් දාලා හොදට හැඳි ගාන්න.
*චීස් ටික දිය වූ පසු තිරිගු පිටි ටික එකතු කරන්න.කැටි නොගැසෙන ලෙස හොදට හැඳි ගාන්න.
*ඊලගට රස අනුව ලුණු, ගම්මිරිස් දමන්න.
*මිශ්‍රණය බුබුළු දාගෙන එනකොට තයිමස්, රෝස්මරි දාලා විනාඩි 2-3ක් හැඳි ගාන්න.
*මිශ්‍රණය කරීම් එකක පදමට එනකොට චීස් සෝස් එක හරි.
*දැන් පොඩි කරගත් සැමන් ටික චීස් සෝස් එකට කවලම් කරන්න.ගොඩක් තදින් හැඳි ගාන්න එපා.
*විනාඩියක් විතර ලිපේ තියලා ඉන්පසුව බා ගන්න.
*දැන් තම්බා ගත් පැස්ටා ටික චීස් සෝස් එකට කවලම් කරගන්න.

බේක් කරලා කන්න කැතිම අයට 

*අවන් එක විනාඩි 10ක් රත් වෙන්න තියනන.(සෙල්සියස් 200ට)
*අවන් එකට දාන්න පුළුවන් ඝාජනයක් ගෙන එයට පැස්ටා ටික දාන්න.
*උඩින් මොසරැල්ලා චීස් ටික දමන්න.
*බිස්කට් කුඩුත් දමන්න.
*දැන් විනාඩි 10ක් බේක් කරගන්න.
     
 

චොක්ලට් කස්ටර්ඩ් මාරි බිස්කට් පුඩින්

                                   

රස මිහිර මේ සුදානම් වෙන්නේ රසම රස චොක්ලට් මාරි බිස්කට් පුඩිමක් සාදාගන්නා ආකාරය කියදීමටයි. 

අවශ්‍ය ද්‍රව්‍ය 

උණු කිරි කෝප්ප 02ක් (fresh milk හෝ කිරිපිටි ගන්න පුළුවන්)
නිවුණු කිරි කෝප්ප 03ක් (fresh milk හෝ කිරිපිටි ගන්න පුළුවන්)
කොන්ෆ්ලා තේ හැඳි 06ක් (ඉරිගු පිටි)
චොක්ලට් පවුඩර් තේ හැඳි 03ක්
සීනි මේස හැඳි 06ක්
වැනිලා බින්දුවක්
මාරි බිස්කට් 300g
බටර් මේස හැඳි 02ක් (මාගරින් ගන්නත් පුළුවන්)

සාදාගන්නා ආකාරය

*ලිපේ තියන්න පුළුවන් භාජනයකට චොක්ලට් පවුඩර්,කොන්ෆ්ලා,සීනි,බටර් දාලා මිශ්‍ර කරගන්න.
*ඒකට නිවුණු කිරි කෝප්ප 03 දාලා හොඳට කවලම් කරන්න.
*දැන්.ඒ මිශ්‍රණය සහිත භාජනය ළිපේ තියෙලා අඩු ගින්දරේ හැඳි ගාන්න.කැටි ගැහෙන්න දෙන්න එපා.
*ටික ටික මිශ්‍රණය බුබුළු දාලා උකු වෙනකන්ම දිගටම හැඳි ගාන්න.
*හොඳට ක්‍රීම් එකක් වගේ උකු උනාම ළිපෙන් බාගන්න.
*අන්තිමට වැනිලා ටිකක් එකතු කරන්න.දැන් චොක්ලට් කස්ටඩ් එක හදලා ඉවරයි.
*දැන් මාරි බිස්කට් උණු කිරි වල පොගවන්න.ගොඩක් පොගවන්න එපා එතකොට බිස්කට් කැඩෙනවා.
*සුදුසු භාජනයක් ගෙන එය පතුලේ කිරිවල පෙගෙවූ මාරි බිස්කට් අතුරා ගන්න.
*දැන් බිස්කට් වලට උඩින් කලින් සාදාගත් චොක්ලට් කස්ටඩ් එකෙන් තට්ටුවක් දමා ගන්න.
*මාරුවෙන් මාරුවට කිරි වල පොගවපු බිස්කට් හා චොක්ලට් කස්ටඩ් දමා ගන්න.
*අන්තිමටම චොක්ලට් තට්ටුවක් දාලා ඉවර කරන්න.
*දැන් පැය 2-3 ක්   ශීතකරණයේ තබන්න.

ෂුගර් කුකීස්

පොඩිත්තන්ට රසවත් කුකීස් එකක් 

අද අපි කියලා දෙන්න යන්නේ දරුවන්ටම විශේෂ වූ කුකීස් වර්ගයක් ගැන. දරුවන්ට රසට කන්න පුළුවන් වගේම අම්මලට ලේසියෙන් හදන්නත් පුළුවන්. කඩෙන් මිලදී ගන්න බිස්කට් වගේ කල් තබාගැනීමේ ද්‍රව්‍ය මුකුත් දාන්නැති නිසා කිසිම බයක් නැතුව ළමයින්ට දෙන්නත් පුළුවන්නේ.

විනාඩි 30ක් වගේ සුළු වෙලාවකින් මෙය සාදා නිමකරගත හැකි වගේම කැමති ආකාරයට හැඩ කරගත හැකිය. එනම් අපි බලමු හදන්නේ කොමද කියලා.

අවශ්‍ය ද්‍රව්‍ය (කුකීස් 12ක් හදන්න පුළුවන්)

   *බටර් 100g
   *සීනි 100g
   *බිත්තර 01
   *පාන් පිටි 150g
   *බේකින් පවුඩර් තේ හැඳි 01
   *වැනිලා තේ හැඳි 01

සාදාගන්නා ආකාරය 

*මුලින්ම අවන් එකේ උෂ්ණත්වය සෙල්සියස් 190ක් කරගෙන රත්වෙන්න හරින්න.

*ඉන්පසු භාජනයකට බටර් හා සීනි දමා හොදින් සීනි දියවෙන තුරු විනාඩි 2-3ක් බීට් කරගන්න.

*පිටි වලට බේකින් පවුඩර් දමා හොදින් කවලම් කරගන්න.

*බේකින් පවුඩර් සමග මිශ්‍ර කරගත් පිටි, බිත්තර, වැනිලා බටර් මිශ්‍රණයට එකතු කරන්න.

*එම මිශ්‍රණය පිටි බෝලයක් වෙනසේ විනාඩි 2-3ක් හොදින් අනාගන්න.

*ගැබුර අඩු, දිග වැඩි බේකින් තැටියක් ගන්න. එයට තෙල් කඩදාසි දමන්න.

*බිස්කට් මිශ්‍රණයේ කුඩා කැබලි ගෙන රවුම් සකසා තැටියෙන් තබන්න.

*දැන් බේකින් තැටිය අවන් එකට දමා බේක් වෙන්න හරින්න.

*දුබුරු පැහැ වෙනතෙක් විනාඩි 15-20ක් තබන්න.එපමණයි.    

ඩෝනට්

මෙන්න ඩෝනට් හදන ලේසිම ක්‍රමය 

ඇත්තටම ඩෝනට් කියන්නේ ලොකු පොඩි කවුරුත් කන්න කැමති කෑමක්.හිතුනු ඕන වෙලාවක කන්නත් පුළුවන්නේ. සමහරු හිතන්නේ මේක හරි අමාරු වැඩක් කියලනේ. අද ඔයාලා දැනගනියි මේක කොච්චර ලේසිද කියලා. අපි බලමු කොහොමද මේක හදන්නේ කියලා. 

අවශ්‍ය ද්‍රව්‍ය 

*සුදු  විනාකිරි මේස හැඳි 02

* කිරි 90ml 

*මාගරින් මේස හැඳි 02

*සුදු සීනි කෝප්ප 1/2

*බිත්තර 01

*වැනිලා තේ හැඳි 1/2

*හලාගත් පාන් පිටි 700g 

*බේකින් සෝඩා තේ හැඳි 1/2

*ලුණු තේ හැඳි 1/4

* ගැබුරු තෙලේ බැදගැනීම සදහා තෙල් 

*අයිසින් සීනි කෝප්ප 1/2  

සාදාගන්නා ආකාරය 

*මුලින්ම විනාකිරි ටිකයි කිරි ටිකයි හොඳට කවලම් කරලා ටිකක් ඝනකම් වෙන්න පැත්තකින් තියන්න.

*ඊට පස්සේ ටිකක් ඉඩකඩ තියෙන බාජනයක, මාගරින් හා සීනි ක්‍රීම් එකක් වෙන තුරු මිශ්‍රකරන්න. දැන් මේ මිශ්‍රණයට බිත්තර හා වැනිලා එකතු කරලා හොඳට කවලම් කරන්න.

*දැන් මේ කරීම් මිශ්‍රනයටම පිටි, බේකින් සෝඩා හා ලුණු එකතු කරන්න.මේ එක්කම කිරියි විනාකිරිත් එකතු කරන්න.මාරුවෙන් මාරුවට ජාති දෙකෙන්ම දමමින් කවලම් කරගන්න. අන්තිමට මිශ්‍රණයෙන් ලොකු බෝලයක් හදා ගන්න.

* සමතලා මතුපිටක පිටි ටිකක් ඉහලා, පිටි බෝලය ඒ මතින් තබා අගල් 1/3 ඝනකමට තුනී කරගන්න.

* ඩෝනට් කටර් එකක් ආධාරයෙන් ඩෝනට් කපාගෙන විනාඩි 10ක් විතර පැත්තකින් තියලා තියන්න.(ඩෝනට් කටර් හැමෝම ලග නැනේ, කොහොමහරි රවුම් කපගන්නයි ඕනේ.ඒ වගේම ඩෝනට් එක මැදින් රවුමක් කපාගන්න)

*ඊට පස්සේ තෙල් ටික තාච්චියට දාලා සෙල්සියස් 190ට රත්කරගන්න. (තෙල් ටික මද ගින්නේ විනාඩි 4ක් විතර රත්කර ගන්න.)

*දැන් ඩෝනට් ටික රත් වෙච්ච තෙල් එකට දාලා රන්වන් පැහැය එනකන් බැද ගන්න.එක පැත්තක් රන්වන් වූ පසු අනෙක් පැත්ත හරවා බැද ගන්න. සරින් සැරේ පැතිවලට හරවන්න එපා.

*ඊට පසු බැදුණු ඩෝනට් ටික තෙලෙන් ඉවත් කර තෙල් බේරෙන්න තියන්න.පේප සර්වියට් තිබේනම් එමගින් තෙල් තෙත්මාත්තු කරගන්න.

*දැන් වැඩේ ඉවරයි.ඩෝනට් එකට උඩින් ඔබ කැමති දෙයක් (චොක්ලට් ක්‍රීම්, අයිසින්) අලේප කරගන්න. 

වටලප්පම්

නියම රහට වටලප්පම් හදන්නේ මෙහෙමයි. 

අවශ්‍ය ද්‍රව්‍ය 

*බිත්තර 15

*හකුරු 750g 

*පොල් ගෙඩ් 2 1/2

*කරදමුංගු ස්වල්පයක් 

*කරාබුනැටි රහ අනුව 

*සාදික්කා රහ අනුව 

*අවශ්‍ය නම් සුවද කුඩු 

*ලුණු රහ අනුව 

සාදන ක්‍රමය 

*පොල් ගෙඩි 2 1/2 ගාගෙන ඉතා උකු පොල් කිරි කෝප්ප තුනක් විතර සකසා ගන්න.

*බිත්තර ටික ගසා පැත්තකින් තබන්න.

*හකුරු ටික කුඩා කැබලි වලට කපා ගෙන ලිප තබා හැඳි ගාමින් හොදින් උණු කරගන්න.

*දැන් සුවුද කුඩු, ලුණු කවලම් කරන්න. දැන් ලිපෙන් බා හොදින් නිවෙන්න තබන්න.හොදටම නිවුණු පසු පොල් කිරි එකතු කරන්න. 

*දැන් හොදට කවලම් කර පෙරා ගන්න. පසුව පෙරා ගත මිශ්‍රණයට පෙර ගසා ගත බිත්තර එකතු කර කවලම් කරන්න. දැන් බාජනයකට දමා ඇතුලට වතුර නොයන ලෙස හොදින් ආවරණය කරන්න.

*තැටියේ මට්ටමට වඩා අඩු මට්ටමකට වතුර දමා හුමාලයෙන් තම්බා ගන්න.

මෂ්රුම් සුප්

රස ගුණ පිරි මැෂ්රුම් සුප් 

රස මිහිර වෙබ් අඩෙවියෙන් ඔබට කියන්න සුදානම් වන්නේ මෂ්රූම් සුප් එකක් සාදාගන්නා ආකාරයයි.මෂ්රූම් කියන්නේ පෝෂණීය ආහාරයක්.විටමින් D අවශ්‍යතාව ඉටු කිරීම,ප්‍රතිශක්තිකරණය වැඩි කිරීම,විස නැසීම,පිත්තාශයේ නිරෝගී බව ආදී සෞක්‍යරක්‍ෂිත කරුණු ගොඩක් මැෂ්රුම් ආහාරයට ගැනීමෙන් ලබාගන්න පුළුවන්. ඉතින් අපි දැන් බලමු මේ රසවත් සුප් එක සාදාගන්නා ආකාරය...

අවශ්‍ය ද්‍රව්‍ය 

මෂ්රුම් 200g
තලා ගත් සුදුළුණු බික් 1-2
කුඩාවට ලියාගත් ළුණු මේස හැඳි 2
බටර් මේස හැඳි 2
පිටි මේස හැඳි 2-3
කුකුළු මස් 700g
කිරි 200ml
ලුනු තේ හැඳි 1/2
ගම්මිරිස් තේ හැඳි 1/4

සාදන ක්‍රමය 

*මෂ්රුම් සෝදා කපාගන්න.
*පෑන් එකක් ලිප තබා බටර් එකතු කර බටර් දියකර ගන්න.එයට ළුණු, සුදුළුණු,මෂ්රුම් එකතු කරගන්න.
*ළුණු හොඳින් තෙම්පරාදු වන තෙක් පිසගන්න.
*පිටි මේස හැඳි 2ක්‌ එකතු කර කලවම් කරගන්න.
*එයට කුකුළු මස් එකතු කර උකුවන තුරු පිසගන්න.
*එයට කිරි එකතු කර තවත් පිටි මේස හැඳි 1ක් එකතු කරගන්න.
*හොඳින් උකු වූ විට ලුනු,ගම්මිරිස් එකතු කර ළිපෙන් බාගන්න.

ගරම් මසාලා

ඉන්දියානු සම්ප්‍රදායික රහ කලාවේ රජු "ගරම් මසාලා".

ඉන්දියානු භාෂාවෙන් එනම් හින්දි භාෂාවෙන් ගරම් කියන්නේ උණුසුම් කියන තේරුමයි. මසාලා කියන්නේ මිශ්‍රණය කියන අර්තයටයි. ආහාරය උණුසුම් කරන මිශ්‍රණය, එනම් හොට් මික්ස් කියන තේරුමයි. ඉන්දියාවේ ප්‍රාන්තයෙන් ප්‍රාන්තයට ගරම් මසාලා සාදන ආකාරය වෙනස් වෙනවා. අපේ රටේ බොහෝ දුරට භාවිතා කරන්නේ කේරළ ප්‍රාන්තයේ ගරම් මසාලා වට්ටෝරුවයි.එහි එතරම් කුළු බඩු භාවිතා කරන්නේ නැ. නමුත් නියම ඖෂදීය ගුණයෙන් යුතු කුළු බඩු පමණක් භාවිතා කරයි. ඉන්දියානු ආහාර රස විදින්න කැමති ඔබට ගරම් මසාලා නිවසේදීම සාදා ගත හැකිය. වෙලදපලෙන් මිලදීගනු ලබන මසාලා කුඩු වලට වැඩිය මෙම පහේ වට්ටෝරුව නිවසේදී සකස් කිරීමේදී කොතරම් සුවද විහිදෙනවාද.කෙතරම් රසවත්ද කියා ඔබට දැනෙයි.  

අවශ්‍ය ද්‍රව්‍ය 

කොත්තමල්ලි කෝප්ප 1/2

සුදුරු කෝප්ප 1/4

මහදුරු මේස හැඳි 01

ශ්‍රී ලාංකේය කරදමුංගු කොළ හා කරදමුංගු 25-30

සාමාන්‍ය ප්‍රමාණයේ බෙලිෆ් කොළ 6-7

කළු කරදමුංගු 10-12

කරාබුනැටි 15-20

වසාවාසි 6-8

අඟල් 2පමණ කුරුදු කැබලි 5-6

ඉගුරු පියල් තේ හැඳි 1/2

ස්ටාර්ඇනිස් 2-3

සාදික්කා මද ස්වල්පයක් 

සාදික්කා පිට කවර ස්වල්පයක් 

ගම්මිරිස් තේ හැඳි 1

පෙරුම්කාය කුඩු ස්වල්පයක් 

සාදන ක්‍රමය 

මෙම සියලු කුළු බඩු වෙන වෙනම බැද ගන්න. විනාඩියක් හෝ විනාඩි එකාමාරක් අඩු ගින්දරේ බැද ගත යුතුය. දුබුරු පැහැ වන විට සුවද හමන්න පටන්ගන්නවා.එවිට ලිප නිවා ගන්න. නැතිනම් පහේ ටික කරවෙයි. කර රහ ඉස්මතු වුවහොත් නියම තුනපහේ රහ යටපත් වෙනවා. වෙන වෙනම බැද ගැනීම අනිවාර්ය වෙනවා.එවිට කුළු බඩු වල ඖෂදීය ගුණය ආරක්ෂා වෙනවා.දැන් සියලු ද්‍රව්‍ය හොදින් අඹරා ගන්න.පසුව පෙනේරයකින් හොදින් කිහිප විටක් හලා ගන්න. දැන් හුලන් නොවදින ලෙස අසුරා තබන්න. 

විශේෂයි 

*මේ සියළු කුළු බඩු අලුත් ඒවා විය යුතුය.*කළු කරදමුංගු තරමක් විශාල දුඹුරු පැහැ ගනකම් පොත්තක් සහිත කුළු බඩුවකි.

*ස්ටාර්ඇනිස් සුපිරි වෙළදසැල් වලින් ගන්න පුළුවන්.

*මෙම කුළු බඩු සමග විවිද මිරිස් වර්ග දෙක තුනක් එකතු කර ගන්න. 

*කහ මෙයට එකතු නොකරන්න. 

    

                 

     

    

    

පාච්මන්ට් අයිසින්

අයිසින් කලාවේ  මල් කුමරිය පාච්මන්ට් අයිසින් 

කේක් එකක් හදන ඕනෙම කෙනෙකුගේ ඊලග ආසාව ඒ කේක් එක අයිසින් කරන්න ඉගෙන ගන්නයි.කොහොමත් සාමාන්‍ය කේක් එකක රහ බලනවට වඩා අයිසින් කේක් එකක් රහ බලන්න තියෙන කැමැත්ත වැඩියි. උපන් දිනයක්, පුංචි පාටියක් තිබුනමත් අපි ගේන්නේ අයිසින් කේක් එකක්. ගෙදරදී වුනත් බටර් කේක් එකක් හැදුවම ඒක අයිසින් කරනකල් ඉවසිල්ලක් නැනේ.

අයිසින් කියන්නේ එක්තරා කළාවක්. හොඳ ඇහැක්, නිර්මාණශීලි හිතක් තියෙන කෙනෙක්ට මේ අයිසින් කළාවෙන් උපරිම ප්‍රයෝජනයක් ගන්න පුළුවන්.    ගෙදර හදන බටර් කේක් එක අයිසින් කරලා පුංචියට පටන් ගන්න ස්වයං රැකියාව තරු පහේ හෝටලයක ගන්න විවාහ උත්සවයක මංගල කේක් ආකෘතියක් හැදීම දක්වා දියුණු ව්‍යාපාරයක හිමිකාරිනියක් වෙන්න පුළුවන්.ඒ නම් අපි බලමු පාච්මන්ට් අයිසින් හදන්නේ කොමද කියලා.

උත්සව වෙනුවෙන් හදන කේක් සරසන මල් වර්ග හදන්නේ මේ පාච්මන්ට් අයිසින් වලින්. පාච්මන්ට් අයිසින් නිවැරදිව හදන විදිහත්, එහිදී ඇතිවන යම් යම් ගැටළු ගැනත්  අද ඔබට දැනගන්න පුළුවන්.

අවශ්‍ය ද්‍රව්‍ය 

*ජෙලටින් මේස හැඳි 01

*උණු වතුර මේස හැඳි 4 1/2

*අයිසින් සීනි 500g 

සාදන ක්‍රමය 

පළමුවෙන් ජෙලටින් වලට උණු වතුර දමා ඩබල් බොයිල් කර ගන්න. එයට පසු ජෙලටින්වලට හලාගත් අයිසින් සීනි ටික ටික දමමින් ගුලියක් ආකාරයට එන සේ මිශ්‍රණය සාදා ගන්න. එය අතේ ඇලෙන නොඇලෙන ප්‍රමාණයට නිවැරදි පදමට අනුව සැකසිය යුතුය. අනතුරුව පොලිතින් එකකින් හොදින් ආවරණය කොට තබා මල් සෑදීම සදහා භාවිතයට ගන්න.

පාච්මන්ට් අයිසින් හදන විට මේ පිළිබද සැලකිලිමත් වන්න.

*දියවී නොයන අන්දමට, පුපුරා ඉරිතලා නොයන ආකාරයට පාච්මන්ට් අයිසින් සාදා ගැනීමේදී භාවිතයට ගන්නා ද්‍රව්‍යයන් නිවැරදි ප්‍රමාණයෙන් ගත යුතුය.

*පාච්මන්ට් අයිසින් මිශ්‍රණය වැලි සහිත ගතියක් නොවී මෘදු වීමට අයිසින් සීනි වර්ගය හොඳ ප්‍රමිතියෙන් යුක්ත විය යුතුය.

*ජෙලටින් තෝරා ගැනීමේදී 'බ්ලුම් ටු හන්ඩ්‍රඩ් ' යනුවෙන් වූ වගය තෝරා ගත යුතුය.

*පාච්මන්ට් අයිසින් ඉරිතැලීම නවතා ගැනීමට සැම විටම අයිසින් මිශ්‍රණය පොලිතින් ආවරණයකින් වසා තබමින් භාවිතයට ගන්න.

*ජෙලටින් හොදින් දියවීම සදහා ගත යුත්තේ එකම බදුන් වර්ගයකි. එනම් වටලප්පන් සැදීමේදී ගන්නා කුඩා බදුන්ය. මේවා වෙළදපලේ විකිනීමට තිබේ.   

බෙක්ඩ් පෑන් කේක්

මන් අද ඔයාලට සන්ද්‍යාවේ තේ මේසයට එක් කරගැනීමට හැකි ඉතා පහසුවෙන් සකස් කරගත හැකි  රස කෑමක් ගැනයි මේ කියන්න හදන්නේ.මේවා තමයි බෙක්ඩ් පෑන් කේක්. 


අවශ්‍ය ද්‍රව්‍ය

බටර් මේස හැඳි 03
පිටි 150g
කිරි 150ml
බීට් කරගත් බිත්තර 02
සුදු සීනි තේ හැඳි 01
ලුනු තේ හැඳි 1/4
ලෙමන් යුෂ 75ml

සාදන ක්‍රමය

*පෑන් එකක් ගෙන එයට බටර් දමන්න.
*220c⁰ උෂ්ණත්වයට උණුසුම් කල අවන් එකේ පෑන් එක බටර් දියවෙන තුරු තබන්න.
*බඳුනක් ගෙන පිටි,කිරි,බිත්තර,සීනි,ලුනු දමා කලවම් කර බටර් දියකරගත් පෑන් එකට එකතු කරගන්න.
*එය නැවත අවන් එකේ තබා දුඹුරු පැහැවන තුරු විනාඩි 20-25 පමණ බේක් කරගන්න.   

අවකාර්ඩෝ බ්‍ර්ව්නීස්

බේක් කරලා හදන ඩෙසර්ට් එකක්,                            අවකාර්ඩෝ බ්‍ර්ව්නීස් 

                    බ්‍රව්නිස් කිව්වම මතක් වෙන්නේ චොක්ලට්.හපලා කද්දී චොක්ලට් බේරෙන බ්‍රව්නිස් කන්න වෙලාවක් ඕනිම නෑ.බ්‍රව්නීස් කියන්නේ ඩෙසර්ට් එකක් උනත් මේවයේ විශේෂත්වයක් තියෙනවා.බ්‍රව්නීස් කියන්නේ බේක් කරලා හදන ඩෙසර්ට් එකක්. ඒ තමයි බ්‍රව්නීස් වල විශේෂත්වය.ඩෙසර්ට් කන්නේ ප්‍රදාන ආහාර වේලකට පසුව උනත් බ්‍රව්නීස් කන්න එහෙම විශේෂයක් ඕනි නැහැ.ඕනෑම වෙලාවක කන්න හිතෙන බ්‍රව්නීස් අද ඉඳන් ඔයාට ගෙදරදී හදන්න පුළුවන්.
    
අද අපි හදන්නේ ඇවකාර්ඩෝ බ්‍රව්නීස්. දන්නවනේ ඉතින් අලිගැට පේර දාලා තමයි මේ බ්‍රව්නීස් හදන්නේ.

අවශ්‍ය ද්‍රව්‍ය 

චොක්ලට් චිප්ස් කප් 1 1/2ක් 
අලිගැටපේර ගෙඩි 2ක් 
සීනි කෝප්ප 1ක් 
බිත්තර 4ක් 
වැනිලා තේ හැඳි 2ක් 
චොක්ලට් පවුඩර් කෝප්ප 1 1/4ක් 
පිටි කෝප්ප 1/2ක් 
ලුණු තේ හැඳි 1/2ක් 

සාදන ක්‍රමය 

* තෝරාගන්නා අලිගැටපේර සාමාන්‍ය ප්‍රමාණයට ඉදුණු ඒවා විය යුතු අතර,පළමුව මඳ සුරා ඒවා හොඳින් පොඩි කරගන්න.
* අවන් එක 180c⁰ උෂ්ණත්වයට රත් කරගන්න 
* බටර් අලේප කර තැටිය සකස් කරගන්න.
*චොක්ලට් චිප්ස් තත්පර 30ක් පමණ මයික්‍රෝවේව් උඳුනේ තබන්න.
*ඉවතට ගෙන හොඳින් කලවම් කර නැවත මයික්‍රෝවේව් උඳුනේ තබන්න.හොඳින් මෘඳු වෙනතුරු එලෙස සිදුකරන්න.
*එය යන්තම් සිසිල් කරගන්න.
*බඳුනක් ගෙන එයට පොඩි කරගත් අලිගැටපේර හා සීනි දමා හොඳින් බීට් කර ගන්න.
*ඉන්පසු එයට බිත්තර,වනිලාද එකතු කර බීට් කරගන්න.
*තවත් බඳුනක් ගෙන චොක්ලට් පවුඩර්,පිටි හා ලුණු එකතු කර හොඳින් කලවම් කරගන්න.
*පිටි මිශ්‍රණය කලින් සාදාගත් මිශ්‍රණයට සෙමින් එකතු කර බීට් කරගන්න.
*ඉන්පසු පිළියෙළ කරගත් ට්‍රේ එකට මිශ්‍රණය දමා ගන්න.
*එය විනාඩි 30ක් පමණ පිස ගන්න.
*කැබැලි කැපීමට පෙර සිසිල් කරගන්න.